ວິທະຍາໄລ ເຕັກນິກ ແຂວງວຽງຈັນ – ສາຂາ ອາຫານ-ການບໍລິການ – ລາຍລະອຽດ

ຄວາມໝາຍ ແລະ ຄວາມສຳຄັນ :

ການຮຽນໃນສາຂາອາຫານ-ການບໍລິການ ຄືການຮຽນຮູ້ກ່ຽວກັບການກະກຽມ ແລະ ການປຸງແຕ່ງອາຫານໃຫ້ຖືກຕາມຫຼັກການ, ຖືກສຸຂະອະນາໄມ ແລະ ມີຄຸນຄ່າທາງດ້ານໂພຊະນາການ ລວມທັງການຮຽນຮູ້ກ່ຽວກັບການໃຫ້ບໍລິການອາຫານ ແລະ ເຄື່ອງດື່ມອີກດ້ວຍ. ການປຸງແຕ່ງອາຫານ ແລະ ການບໍລິການເຄື່ອງດື່ມ ຄືໝາກຫົວໃຈຫຼັກຂອງທຸລະກິດຮ້ານອາຫານ ນອກຈາກການບໍລິການ ແລະ ບັນຍາກາດຂອງສະຖານທີ່ ທີ່ຈະສ້າງຄວາມປະທັບໃຈໃຫ້ກັບແຂກ ລົດຊາດອາຫານ ແລະ ເຄື່ອງດື່ມທີ່ແຊບຊ້ອຍຈະເຮັດໃຫ້ແຂກເພິ່ງພໍໃຈ ແລະ ກັບມາໃຊ້ບໍລິການອີກຄັ້ງ.

ຈຸດປະສົງ :

• ສ້າງໃຫ້ຜູ້ຮຽນມີຄວາມຮູ້, ມີທັກສະອາຊີບ ແລະ ປະສົບການກົງກັບມາດຕະຖານອາຊີບ ເພື່ອນໍາໄປປະຕິບັດງານວິຊາສະເພາະ ໄດ້ຢ່າງມີປະສິດທິພາບ, ແທດເໝາະກັບຄວາມຕ້ອງການຂອງຕະຫຼາດແຮງງານ.
• ສ້າງໃຫ້ຜູ້ຮຽນມີຫົວຄິດປະດິດສ້າງ, ແກ້ໄຂບັນຫາ ແລະ ມີຄວາມສາມາດປະຕິບັດໜ້າທີ່ວຽກງານດ້ານວິຊາສະເພາະຕາມລໍາດັບທີ່ຕົນຮຽນຈົບ.
• ສ້າງໃຫ້ຜູ້ຮຽນມີມະນຸດສຳພັນ, ມີຄຸນນະທຳ, ຈະລິຍະທໍາ ແລະ ຈັນຍາບັນໃນອາຊີບ.

ເງື່ອນໄຂຜູ້ເຂົ້າຮຽນກ່ຽວຂ້ອງ :

• ຕ້ອງຮຽນຈົບມັດທະຍົມຕອນຕົ້ນ ຫຼື ທຽບເທົ່າ

ວິຊາຮຽນທີ່ກ່ຽວຂ້ອງ:

1. ການປຸງແຕ່ງອາຫານຄາວ
2. ການປຸງແຕ່ງອາຫານຫວານ
3. ການເຮັດເຄື່ອງດື່ມ
4. ແກະສະຫຼັກຜັກ ແລະ ໝາກໄມ້
5. ຕົບແຕ່ງດອກໄມ້
6. ວຽກໃບຕອງ
7. ການເກັບຮັກສາອາຫານ
8. ການບໍລິການອາຫານ ແລະ ເຄື່ອງດື່ມ
9. ວຽກແມ່ບ້ານ
10. ການເຮັດທຸລະກິດຂະໜາດນ້ອຍ.

ນະໂຍບາຍຕ່າງໆ:

• ນັກສຶກສາທີ່ຜ່ານການສໍາພາດ ແລະ ໄດ້ເຂົ້າຮຽນແມ່ນໄດ້ຮຽນຟຣີບໍ່ໄດ້ຈ່າຍຄ່າເທີມ.

ສິ່ງອໍານວຍຄວາມສະດວກ:

• ມີຫໍພັກໃຫ້ກັບນັກສຶກສາທັງຍິງ ແລະ ຊາຍ.
• ມີຫ້ອງປະຕິບັດ
• ມີວັດສະດຸ ແລະ ອຸປະກອນເຄື່ອງໃຊ້ໃນການຮຽນ.

ຄວາມຮູ້ ແລະ ທັກສະພາຍຫຼັງການຮຽນຈົບ:

• ສາມາດກະກຽມອຸປະກອນ, ວັດຖຸດິບ ແລະ ປຸງແຕ່ງອາຫານຄາວ ແລະ ອາຫານຫວານໄດ້ຕາມສູດ.

• ຮູ້ຕົບແຕ່ງຈານອາຫານ, ແກະສະຫຼັກຜັກ ແລະ ໝາກໄມ້ໃນຮູບແບບຕ່າງໆ.

• ເຮັດວຽກໃບຕອງໃນງານຕ່າງໆໄດ້ ແລະ ສາມາດເຮັດວຽກແມ່ບ້ານໄດ້.

• ສາມາດປະກອບອາຊີບເປັນພະນັກງານໃນຮ້ານອາຫານ ຫຼື  ໂຮງແຮມໄດ້.

• ສາມາດປະກອບທຸລະກິດເປີດຮ້ານອາຫານເປັນຂອງຕົນເອງ. 

ວີທີສະໝັກຮຽນ

–          ຂັ້ນຕອນທີ 1: ແມ່ນພົວພັນຊື້ແບບຟອມສະໝັກເຂົ້າຮຽນ ໄດ້ທີ່ພະແນກກິດຈະການນັກຮຽນ-ນັກສຶກສາ ຂອງວິທະຍາໄລເຕັກນິກແຂວງວຽງຈັນ.

–          ຂັ້ນຕອນທີ 2: ແມ່ນປະກອບເອກະສານຕາມແບບຟອມທີ່ກຳນົດໃຫ້.

–          ຂັ້ນຕອນທີ 3: ຜູ້ສະໝັັກຮຽນຕ້ອງມາຍື່ນແບບຟອມສະໝັກດ້ວຍຕົນເອງ.

–          ຂັ້ນຕອນທີ 4: ລໍຖ້າຮັບບັດເຂົ້າຫ້ອງສອບສຳພາດ ຫຼື ສອບເສັງ.

ເອກະສານປະກອບການສະໝັກຮຽນມີ:

1. ສຳເນົາໃບປະກາດຈົບການສຶກສາຊັ້ນມັດທະຍົມຕອນຕົ້ນ ຫຼື ທຽບເທົ່າ
2. ຊີວະປະຫວັດນັກຮຽນ.
3. ໃບຢັ້ງຢືນສຸຂະພາບ.
4. ໃບຢັ້ງຢືນທີ່ຢູ່.
5. ຮູບຖ່າຍ 3×4 ຈໍານວນ 4 ໃບ (ຖ່າຍບໍ່ເກີນ 3 ເດືອນ)