ວິທະຍາໄລ ເຕັກນິກ ແຂວງວຽງຈັນ – ສາຂາ ອາຫານ-ການບໍລິການ – ລາຍລະອຽດ

ຄວາມໝາຍ ແລະ ຄວາມສຳຄັນ :

ການຮຽນໃນສາຂາອາຫານ-ການບໍລິການ ຄືການຮຽນຮູ້ກ່ຽວກັບການກະກຽມ ແລະ ການປຸງແຕ່ງອາຫານໃຫ້ຖືກຕາມຫຼັກການ, ຖືກສຸຂະອະນາໄມ ແລະ ມີຄຸນຄ່າທາງດ້ານໂພຊະນາການ ລວມທັງການຮຽນຮູ້ກ່ຽວກັບການໃຫ້ບໍລິການອາຫານ ແລະ ເຄື່ອງດື່ມອີກດ້ວຍ. ການປຸງແຕ່ງອາຫານ ແລະ ການບໍລິການເຄື່ອງດື່ມ ຄືໝາກຫົວໃຈຫຼັກຂອງທຸລະກິດຮ້ານອາຫານ ນອກຈາກການບໍລິການ ແລະ ບັນຍາກາດຂອງສະຖານທີ່ ທີ່ຈະສ້າງຄວາມປະທັບໃຈໃຫ້ກັບແຂກ ລົດຊາດອາຫານ ແລະ ເຄື່ອງດື່ມທີ່ແຊບຊ້ອຍຈະເຮັດໃຫ້ແຂກເພິ່ງພໍໃຈ ແລະ ກັບມາໃຊ້ບໍລິການອີກຄັ້ງ.

ຈຸດປະສົງ :

• ສ້າງໃຫ້ຜູ້ຮຽນມີຄວາມຮູ້, ມີທັກສະອາຊີບ ແລະ ປະສົບການກົງກັບມາດຕະຖານອາຊີບ ເພື່ອນໍາໄປປະຕິບັດງານວິຊາສະເພາະໄດ້ຢ່າງມີປະສິດທິພາບ, ແທດເໝາະກັບຄວາມຕ້ອງການຂອງຕະຫຼາດແຮງງານ.

• ສ້າງໃຫ້ຜູ້ຮຽນມີຫົວຄິດປະດິດສ້າງ, ແກ້ໄຂບັນຫາ ແລະ ມີຄວາມສາມາດປະຕິບັດໜ້າທີ່ວຽກງານດ້ານວິຊາສະເພາະຕາມລໍາດັບທີ່ຕົນຮຽນຈົບ.

• ສ້າງໃຫ້ຜູ້ຮຽນມີມະນຸດສຳພັນ, ມີຄຸນນະທຳ, ຈະລິຍະທໍາ ແລະ ຈັນຍາບັນໃນອາຊີບ.

ເງື່ອນໄຂຜູ້ເຂົ້າຮຽນກ່ຽວຂ້ອງ : 

• ຕ້ອງຮຽນຈົບປະຖົມຂື້ນໄປ

ວິຊາຮຽນທີ່ກ່ຽວຂ້ອງ:

1. ການຮຽນແມ່ນຮຽນຮູ້ກ່ຽວກັບການປຸງງແຕ່ງອາຫານລາວປະເພດຕ່າງໆເຊັ່ນ: ແກງ, ປົ່ນ, ປີ້ງ, ແຈ່ວ, ລາບ
2. ການປຸງແຕ່ງປະເພດເສັ້ນ,
3. ເຂົ້າໜົມຫວານ ແລະ ເຄັມ.
4. ການຮຽນຮູ້ກ່ຽວກັບການສື່ສານໃນສະຖານທີ່ເຮັດວຽກ
5. ການນໍາໃຊ້ທັກສະຊີວິດ 
6. ພາສາອັງກິດສໍາຫຼັບການສື່ສານໃນລະດັບພື້ນຖານ.

ນະໂຍບາຍຕ່າງໆ:

ມີຫໍພັກໃຫ້ນັກຮຽນ, ມີເບ້ຍລ້ຽງໃຫ້ແກ່ຜູ້ຮຽນ.

ສິ່ງອໍານວຍຄວາມສະດວກ:

• ມີຫ້ອງປະຕິບັດ
• ມີວັດສະດຸ ແລະ ອຸປະກອນເຄື່ອງໃຊ້ໃນການຮຽນ.

ຄວາມຮູ້ ແລະ ທັກສະພາຍຫຼັງການຮຽນຈົບ:

• ສາມາດກະກຽມອຸປະກອນ, ເຄື່ອງມື ແລະ ວັດຖຸດິບໃນການປຸງແຕ່ງອາຫານ ພ້ອມດຳເນີນຂັ້ນຕອນວິທີການປຸງແຕ່ງອາຫານ ໂດຍສະເພາະອາຫານລາວ ໄດ້ຖືກຕ້ອງຕາມຂັ້ນຕອນ ແລະ ວິທີການ, ພ້ອມທັງວິທີການເກັບຮັກສາທີ່ຖືກຕ້ອງ.

• ສາມາດປະກອບອາຊີບໃນຮ້ານອາຫານ ຫຼື ໂຮງແຮມໄດ້.
•  

ວີທີສະໝັກຮຽນ

–          ຂັ້ນຕອນທີ 1: ແມ່ນພົວພັນຊື້ແບບຟອມສະໝັກເຂົ້າຮຽນໄດ້ທີ່ພະແນກກິດຈະການນັກຮຽນ-ນັກສຶກສາ ຂອງວິທະຍາໄລເຕັກນິກແຂວງວຽງຈັນ.

–          ຂັ້ນຕອນທີ 2: ແມ່ນປະກອບເອກະສານຕາມແບບຟອມທີ່ກຳນົດໃຫ້.

–          ຂັ້ນຕອນທີ 3: ຜູ້ສະໝັັກຮຽນຕ້ອງມາຍື່ນແບບຟອມສະໝັກດ້ວຍຕົນເອງ.

–          ຂັ້ນຕອນທີ 4: ລໍຖ້າຮັບບັດເຂົ້າຫ້ອງສອບສຳພາດ ຫຼື ສອບເສັງ.

ເອກະສານປະກອບການສະໝັກຮຽນມີ:

1. ສໍາເນົາໃບປະກາດຈົບຊັ້ນປະຖົມ
2. ຊີວະປະຫວັດນັກຮຽນ.
3. ໃບຢັ້ງຢືນສຸຂະພາບ.
4. ໃບຢັ້ງຢືນທີ່ຢູ່.
5. ຮູບຖ່າຍ 3×4 ຈໍານວນ 4 ໃບ (ຖ່າຍບໍ່ເກີນ 3 ເດືອນ)