ໂຮງຮຽນເຕັກນິກ-ວິຊາຊີບແບບປະສົມແຂວງຊຽງຂວາງ ການປຸງແຕ່ງອາຫານ – ລາຍລະອຽດ

ຄວາມໝາຍ ແລະ ຄວາມສຳຄັນ :

ການຮຽນໃນສາຂາປຸງແຕ່ງອາຫານ ຄືການຮຽນຮູ້ວິທີການປຸງແຕ່ງອາຫານລາວໃຫ້ຖືກຕ້ອງ ແລະ  ແຊບຕາມແບບດັ້ງເດີມ, ຮູ້ຈັກປະຍຸກນໍາໃຊ້ວັດຖຸດິບຕ່າງໆໃນການປະກອບອາຫານ, ສຶກສາຫຼັກການ ຂັ້ນຕອນຕ່າງໆໃນການປຸງແຕ່ງ, ການກຽມວັດຖຸດິບປະເພດຕ່າງໆ ໂດຍໃສ່ໃຈເລື່ອງຄວາມສະອາດເປັນຫຼັກ. ການປຸງແຕ່ງອາຫານລາວມີຄວາມສຳຄັນເປັນຢ່າງຍິ່ງຕໍ່ການສືບທອດ ແລະ ຮັກສາວັດທະນະທຳໃນການເຮັດອາຫານລາວໃຫ້ເປັນເອກະລັກ ສາມາດນຳໃຊ້ເຂົ້າໃນການດຳລົງຊີວິດປະຈໍາວັນ ພ້ອມທັງສ້າງອາຊີບ ແລະ ລາຍຮັບໃຫ້ຕົນເອງ ແລະຄອບຄົວ ພ້ອມທັງສົ່ງເສີມ ວຽກງານການບໍລິການທາງດ້ານຂະແໜງການທ່ອງທ່ຽວ ໂຮງແຮມ ແລະ ຮ້ານອາຫານນຳອີກດ້ວຍ

ຈຸດປະສົງ :

• ສ້າງໃຫ້ຜູ້ຮຽນມີຄວາມຮູ້, ມີທັກສະອາຊີບ ແລະ ປະສົບການກົງກັບມາດຕະຖານອາຊີບ ເພື່ອນໍາໄປປະຕິບັດງານວິຊາສະເພາະໄດ້ຢ່າງມີປະສິດທິພາບ ແທດເໝາະກັບຄວາມຕ້ອງການຂອງຕະຫຼາດແຮງງານ.
• ສ້າງໃຫ້ຜູ້ຮຽນມີຫົວຄິດປະດິດສ້າງ, ແກ້ໄຂບັນຫາ ແລະ ມີຄວາມສາມາດປະຕິບັດໜ້າທີ່ວຽກງານດ້ານວິຊາສະເພາະຕາມລະດັບທີ່ຕົນຮຽນຈົບ.
• ສ້າງໃຫ້ຜູ້ຮຽນມີມະນຸດສຳພັນດີ, ມີຄຸນນະທຳ, ຈະລິຍະທຳ ແລະ ຈັນຍາບັນໃນອາຊີບ.

ເງື່ອນໄຂຜູ້ເຂົ້າຮຽນກ່ຽວຂ້ອງ:

• ຕ້ອງຮຽນຈົບປະຖົມຂື້ນໄປ

ວິຊາທີ່ກ່ຽວຂ້ອງ :

1. 1.   ການປຸງແຕ່ງອາຫານລາວ
   2.   ການປຸງແຕ່ງອາຫານສາກົນ
   3.   ວິທີການໃຫ້ບໍລິການ
   4.   ວິທີການຕົບແຕ່ງຈານອາຫານ ແລະ ການເຮັດເຂົ້າໝົມຫວານພື້ນບ້ານ

ນະໂຍບາຍຕ່າງໆ:

• ສຳລັບນັກຮຽນຜູ້ທີມີໃບຢັ້ງຢືນຈາກບ້ານ ແລະ ວ່າເປັນຄອບຄົວທີ່ທຸກຍາກແມ່ນຈະບໍ່ໄດ້ເສຍຄ່າທຳນຽມ
• ມີນະໂຍບາຍໃຫ້ຜູ້ທີ່ຊ່ວຍວຽກໂຮງຮຽນເຊັ່ນວ່າ: ເປັນປ້ອງກັນໂຮງຮຽນຈະຖືກຍົກເວັ້ນຄ່າຮຽນ ແລະ ໄດ້ຮັບນະໂຍບາຍອື່ນເພີ່ມນຳ
• ນັກຮຽນຜູ້ທີ່ເຈັບເປັນນອນໂຮງໝໍ ຫຼື ວ່າຜ່າຕັດຕ່າງໆ ແມ່ນຈະໄດ້ຮັບນະໂຍບາຍຈາກໂຮງຮຽນຈຳນວນໜຶ່ງ:

ສິ່ງອໍານວຍຄວາມສະດວກ:

• ໃນໂຮງຮຽນມີສະຖານທີ່ພັກເຊົາ (ຫໍພັກ-ຍິງຊາຍ).
• ມີໂຮງຊ່າງໃນພາກປະຕິບັດ.
• ມີສະຖານທີ່ຈອດລົດກ້ວາງຂວາງ, ມີໄຟຟ້າ, ນ້ຳປະປາ.

ຄວາມຮູ້ ແລະທັກສະພາຍຫຼັງການຮຽນຈົບ :

• ສາມາດດຳເນີນການປຸງແຕ່ງອາຫານປະເພດຕ່າງໆເຊັ່ນ: ອາຫານປະເພດແກງ, ປະເພດປົ່ນ, ປະເພດປີ້ງ , ປະເພດຊຸບ (ລາວ), ປະເພດແຈ່ວ, ອາຫານປະເພດຂົ້ວ, ອາຫານປະເພດລາບ, ອາຫານປະເພດລວກ, ເຂົ້າໝົມຫວານ, ເຂົ້າໝົມເຄັມ, ອາຫານປະເພດເສັ້ນ (ເຂົ້າປຸ້ນ, ໝີ່ກະທິ, ສະເຕັກ).
• ຮູ້ວິທີເກັບຮັກສາ ແລະ ອຸ່ນຄືນອາຫານປະເພດແກງຕາມຫຼັກອານາໄມ.
• ສາມາດປະກອບອາຊີບເຮັດວຽກຢູ່ນໍາຮ້ານອາຫານ ຫຼື ໂຮງແຮມໄດ້.

ວີທີສະໝັກຮຽນ

• ຂັ້ນຕອນທີ 1:  ຊື້ຄຳຮ້ອງຂໍເຂົ້າຮຽນແລ້ວປະກອບຂໍ້ມູນໃຫ້ຄົບຖ້ວນ.
• ຂັ້ນຕອນທີ 2: ນໍາເອົາເອກະສານມາໃຫ້ທາງໂຮງຮຽນກວດສອບຄວາມຖືກຕ້ອງ ແລະ ຄົບຖ້ວນຂອງຂໍ້ມູນ.
• ຂັ້ນຕອນທີ 3: ຫາກເອກະສານຄົບຖ້ວນແລ້ວແມ່ນເຂົ້າສຳພາດເຂົ້າຮຽນໂດຍການທົດສອບ ຫຼື ຄັດເລືອກ ດ້ວຍການຂຽນ, ສຳພາດ ແລະ ທົດສອບດ້ານສີມືໂດຍມີຄະນະກຳມະການທີ່ຮັບການແຕ່ງຕັ້ງຢ່າງເປັນທາງການ.

ເອກະສານປະກອບການສະໝັກຮຽນມີ:

1. ສໍາເນົາໃບປະກາດຈົບຊັ້ນປະຖົມ
2. ໃບຄະແນນ
3. ຊີວະປະຫວັດນັກຮຽນ
4. ໃບຢັ້ງຢືນທີ່ຢູ່
5. ໃບຢັ້ງຢືນສຸຂະພາບ(ສໍາລັບນັກຮຽນ)