ໂຮງຮຽນເຕັກນິກ-ວິຊາຊີບແບບປະສົມ ແຂວງໄຊຍະບູລີ – ສາຂາ ການປຸງແຕ່ງອາຫານ ແລະ ການບໍລິການເຄື່ອງດື່ມ 12+2 – ລາຍລະອຽດ

ຄວາມໝາຍ ແລະ ຄວາມສຳຄັນ :

ການຮຽນໃນສາຂາປຸງແຕ່ງອາຫານ ແລະ ບໍລິການເຄື່ອງດື່ມ ຄືການຮຽນຮູ້ວິທີການປຸງແຕ່ງອາຫານທີ່ ແຊບ ແລະ ຖືກຕ້ອງຕາມໂພສະນາການ, ຮຽນຮູ້ກ່ຽວກັບການປະສົມເຄື່ອງດື່ມປະເພດຕ່າງໆ ໂດຍເສີມສ້າງແນວຄດສ້າງສັນໃນການສັນສ້າງອາຫານ ແລະ ເຄື່ອງດື່ມຕ່າງໆ.  ການປຸງແຕ່ງອາຫານ ແລະ ການບໍລິການເຄື່ອງດື່ມ ຄືໝາກຫົວໃຈຫຼັກຂອງທຸລະກິດຮ້ານອາຫານ ນອກຈາກການບໍລິການ ແລະ ບັນຍາກາດຂອງສະຖານທີ່ ທີ່ຈະສ້າງຄວາມປະທັບໃຈໃຫ້ກັບແຂກ ລົດຊາດອາຫານ ແລະ ເຄື່ອງດື່ມທີ່ແຊບຊ້ອຍຈະເຮັດໃຫ້ແຂກເພິ່ງພໍໃຈ ແລະ ກັບມາໃຊ້ບໍລິການອີກຄັ້ງ.

ຈຸດປະສົງ :

• ສ້າງໃຫ້ຜູ້ຮຽນມີຄວາມຮູ້, ມີທັກສະອາຊີບ ແລະ ປະສົບການດ້ານທັກສະກ່ຽວກັບການປຸງແຕ່ງອາຫານ ແລະ ການບໍລິການ ແລະ ເຄື່ອງດື່ມ ໃຫ້ກົງກັບມາດຕະຖານອາຊີບສາມາດນຳໄປປະຕິບັດໃນວຽກງານວິຊາສະເພາະໄດ້ຢ່າງມີປະສິດທິພາບ ແລະ ແທດເໝາະກັບຄວາມຕ້ອງການຂອງຕະຫຼາດແຮງງານ.

• ສ້າງໃຫ້ຜູ້ຮຽນມີຫົວຄິດປະດິດສ້າງ, ແກ້ໄຂບັນຫາໄດ້ ແລະ ມີຄວາມສາມາດປະຕິບັດໜ້າທີ່ວຽກງານດ້ານວິຊາສະເພາະຕາມລະດັບທີ່ຕົນເອງຮຽນຈົບ.

• ສ້າງໃຫ້ຜູ້ຮຽນມີມະນຸດສຳພັນດີ, ມີຄຸນນະທຳ, ຈະລິຍະທຳ ແລະ ຈັນຍາບັນໃນອາຊີບ.

ເງື່ອນໄຂຜູ້ເຂົ້າຮຽນກ່ຽວຂ້ອງ:

• ຕ້ອງຮຽນຈົບມັດທະຍົມຕອນປາຍ ຫຼື ທຽບເທົ່າ

ວິຊາຮຽນທີ່ກ່ຽວຂ້ອງ :

1.     ການເມືອງ
2.     ວັດທະນາທໍາລາວ
3.     ການສື່ສານເປັນພາສາອັງກິດ
4.     ການນໍາໃຊ້ເຄື່ອງມື ແລະ ຂະບວນຕ່າງໆທາງທຸລະກິດ
5.     ການເຮັດວຽກກັບເພື່ອນຮ່ວມງານ ແລະ ລູກຄ້າ
6.     ການປະກອບທຸລະກິດສໍາລັບອຸດສາຫະກໍາການທ່ອງທ່ຽວ ແລະ ການບໍລິການ
7.     ການນໍາໃຊ້ອຸປະກອນສື່ສານສໍາລັບການທ່ອງທ່ຽວ ແລະ ການບໍລິການທ່ອງທ່ຽວ
8.     ການຮັກສາຄວາມປອດໄພ ແລະ ຄວາມສະຫງົບໃນບ່ອນເຮັດວຽກ
9.     ການສ້າງການບໍລິການໃຫ້ແກ່ລູກຄ້າຢ່າງມີປະສິດທິພາບ
10. ການພັດທະນາຄວາມຮູ້ທາງດ້ານອຸດສາຫະກໍາການທ່ອງທ່ຽວ ແລະ ການບໍລິການ
11. ການແນະນໍາກ່ຽວກັບຫຼັກການພື້ນຖານໃນການປຸງແຕ່ງອາຫານ
12. ການກະກຽມ ແລະ ການປຸງແຕ່ງອາຫານລາວ
13. ການດໍາເນີນການປຸງແຕ່ງອາຫານ
14. ການວາງແຜນບໍລິການຈັດສົ່ງອາຫານ ແລະ ການຈັດງານລ້ຽງ
15. ການບໍລິການອາຫານ ແລະ ເຄື່ອງດື່ມ
16. ການກະກຽມເຂົ້າຈີ່, ເຄັກ ເຂົ້າໜົມປະເພດອົບ ແລະ ອາຫານຫວານຂັ້ນພື້ນຖານ
17. ການບໍລິການເຄື່ອງດື່ມໃນບາເຫຼົ້າ

ນະໂຍບາຍຕ່າງໆ:

• ນັກສຶກສາທີ່ເປັນນັກສຶກສາໃນແຜນ(ບໍ່ແມ່ນພະນັກງານມາຮຽນຕໍ່)ຈະໄດ້ຮັບເບ້ຍລ້ຽງ.

• ນະໂຍບາຍເຈັບເປັນ ແລະ ເສຍຊີວິດ

ສິ່ງອໍານວຍຄວາມສະດວກ:

• ມີຫໍພັກ, ຫ້ອງຮຽນ, ຫ້ອງຝຶກງານ
• ອຸປະກອນຮັບໃຊ້ການຮຽນ-ການສອນ
• ງົບປະມານຮັບໃຊ້ພາກປະຕິບັດໃນການຊື້ວັດຖຸດິບ.

ຄວາມຮູ້ ແລະ ທັກສະພາຍຫຼັງການຮຽນຈົບ:

• ສາມາດປຸງແຕ່ງອາຫານລາວ ແລະ ອາຫານສາກົນໄດ້.

• ຮູ້ບໍລິການອາຫານ ແລະ ເຄື່ອງດື່ມໃຫ້ແຂກ.

• ຮູ້ປະສົມເຫຼົ້າວາຍ, ຄອກເທວ, ຮູ້ວິທີການເຮັດເບີເກີລີ, ເຄັກ ແລະ ແຊນວິດປະເພດຕ່າງໆ.

• ສາມາດປະກອບອາຊີບນໍາເຈົ້າຂອງກິດຈະການ ແລະ ສ່ວນຕົວໄດ້.

ວິທີສະໝັກຮຽນ

• ຂັ້ນຕອນທີ 1: ຊື້ຄໍາຮ້ອງສະໝັກເຂົ້າຮຽນ.
• ຂັ້ນຕອນທີ 2: ປະກອບເອກະສານຕິດຂັດຕາມຂໍ້ແນະນໍາ (ໃບປະກາດຈົບສາມັນ, ໃບຄະແນນ, ໃບຢັ້ງຢືນທີ່ຢູ່, ໃບຢັ້ງຢືນສຸຂະພາບ, ໃບແຈ້ງໂທດ, ຮູບ3×4 ບໍ່ກາຍ 3 ເດືອນ ຈໍານວນ 3 ໃບ).
• ຂັ້ນຕອນທີ 3: ສໍາພາດດ້ວຍຕົນເອງໃນສາຂາທີ່ຕົນເອງສະໝັກຮຽນ.
• ຂັ້ນຕອນທີ 4: ລໍຖ້າຜົນຂອງການສໍາພາດ ເພື່ອກະກຽມເຂົ້າຮຽນ.

ເອກະສານປະກອບການສະໝັກຮຽນມີ:

1. ສໍາເນົາໃບປະກາດຈົບຊັ້ນມັດທະຍົມຕອນປາຍ ຫຼື ທຽບເທົ່າ
2. ໃບຄະແນນ
3. ໃບຢັ້ງຢືນທີ່ຢູ່
4. ໃບແຈ້ງໂທດ(ບໍ່ເກີນ 3 ເດືອນ)
5. ໃບຢັ້ງຢືນສຸຂະພາບ
6. ຮູບຖ່າຍຂະໜາດ 3×4 ຈໍານວນ 3 ໃບ (ຖ່າຍບໍ່ເກີນ 3 ເດືອນ)